[东方报]歐冠：歐聯8強戰火漫天熱門Vs冷門激戰打孖上[04-09]

射手對決巴塞大起多蒙特
周四凌晨歐聯8強首回合大戰，2支冠軍賠率最熱嘅球隊，分別於主場接受最冷奪冠球隊挑戰，西甲勁旅巴塞隆拿主場迎戰多蒙特，以及法甲冠軍巴黎聖日耳門對阿士東維拉；究竟會出現預期嘅賽果，定係意想不到嘅爆冷戰局？

今晚歐聯8強首回合重頭戲，奪冠大熱巴塞隆拿主場火併上屆亞軍多蒙特。今場亦係兩位前拜仁主帥正面交鋒，費歷克麾下嘅巴塞火力全開，以拉芬夏比洛尼為首嘅3叉戟入波停不了，「蜜蜂兵團」有射手古拉斯助陣唔會縮，鬥攻格局實多波入，3.5球大盤有計。（Now 638周四凌晨3時直播）

多蒙特主帥尼高高華同巴塞教頭費歷克，曾於2019年喺拜仁共事，不過尼高高華在當年11月被炒，助手費歷克臨危受命，竟然帶出個6冠王，今場呢對前拜仁上司下屬大鬥法，噱頭十足。費歷克今季轉教巴塞後，不但將傳控同逼搶升呢，更加入快速反擊元素，令「地上最強」無堅不摧，今屆歐聯錄8勝1和1負兼入32粒，單計5場主場便入17球，有4場開4球或以上。

3叉戟入球停不了
同樣效力過拜仁嘅羅拔利雲度夫斯基，夥拍拉芬夏比洛尼、拉明耶馬組成嘅3叉戟，則佔咗23球，其中拉芬夏比洛尼更以11粒，高踞射手榜榜首，勒都勒唔住，為衝3冠必定火力全開。

另邊廂，多蒙特今季表現差強人意，喺聯賽只排第8位，要爭入前4嘅下屆歐聯參賽資格，機會一般，勢必喺今屆歐聯力爭冠軍，今仗會放手一搏。查實尼高高華喺今年2月頭，先至中途接手多蒙特，單計4場歐聯錄2勝2和，包括16強淘汰里爾，絕對唔差，不過防中柏斯高哥斯坐波監，賽前又收到壞消息，中堅尼高舒洛達碧克因膝傷提早收咧，惟有以攻代守，幸好箭頭古拉斯腳風奇順，今屆歐聯有10球進帳，僅次於巴塞嘅拉芬夏比洛尼，今仗兩大射手大鬥法，隨時合演入球騷。