[东方报]歐冠：聖占士打高一皮波 紐卡素大盤有揸拿[09-18]

闊別歐聯1年，重返歐洲球會最高水平賽事嘅紐卡素，第一場就要鬥巴塞隆拿。雖然外間睇淡紐卡素，但佢哋前屆曾經喺聖占士球場以4比1打爆巴黎聖日耳門，主場確係打高一皮波，遇正近5場歐聯全開4球或以上嘅巴塞，有望合演入球騷，3.5球大盤玩得過。（Now 643周五凌晨3時直播）

為咗隆重其事今場波，紐卡素請嚟艾斯派拿入場做「神獸」觀戰，呢名哥倫比亞射手於28年前，曾經喺聖占士球場連中三元，助「喜鵲」以3比2擊敗有安歷基及費高入波嘅巴塞，預料今場佢同另一名宿舒利亞都會做「吉祥物」。事實上紐卡素主場特醒，前屆曾以4比1大炒PSG，加上新兵禾達美迪勁對辦，上場英超首戰就入波幫球隊擊敗狼隊，紐卡素爭贏拜仁簽入呢位中鋒，可謂執到筍嘢。

巴塞火力澎湃作客照攻
巴塞今場冇拉明耶馬，但球隊火力仍然強大，啱啱喺西甲就6比0大炒華倫西亞，頂替耶馬嘅費明盧比斯、拉芬夏比洛尼同羅拔利雲度夫斯基都梅開二度，今場唔愁冇波入。球隊仲有另一好消息，「地上最高」主帥費歷克，早前打甩上屆歐聯領紅牌嘅停賽處分，今場可以正常督帥，佢哋近5場歐聯全開4球或以上，作客以攻代守，一於繼續撐入球大。