[东方报]英超：近年交鋒冇留手 韋斯咸森林大亂鬥[01-06]

英超聯賽榜下游搶分戰，韋斯咸對諾定咸森林，韋斯咸近9場未贏過，上仗「護級6分波」淨吞狼隊3蛋，士氣大受打擊，當務之急係止住跌勢，對手森林近期亦連輸4場，兩隊都希望喺對方身上搶分，邊隊贏冇得估，不過雙方近6次交手，5次開3球或以上，2.5球入球大係明智之選。（Now621、611周三凌晨4時直播）

兩隊有個共同點，就係換領隊如走馬燈，韋斯咸季初炒咗樸達，現任領隊紐奴，就係上季幫森林攞到歐洲賽資格嘅功勛主帥，森林季初炒咗紐奴後，曾聘用上季幫熱刺贏歐霸盃嘅普斯迪高路，但好快又換帥，現時由「護級專家」戴治領軍，今場亦係紐奴對森林嘅倒戈之戰，因此雙方除咗護級，仲有恩怨要清算。

錘仔幫平均場失超2球
韋斯咸近9場4和5負，現時排18位，護級形勢告急，上場大敗於狼隊腳下，紐奴坦言係佢執教生涯最差一仗，會方亦傳出再度換帥消息，內部人心惶惶；其實佢哋攻力唔差，查洛保雲、哥林威爾遜、盧卡斯柏基達都有數胡能力，只係防守唔掂，失41球屬英超最多，平均每場失2.05球，先至搞成咁。

森林聖誕新年快車4場輸晒，現時排17位，球隊近況咁差，但今場作客竟然要讓波，實在捧唔落手，既然雙方近年交手多波入，轉玩入球大啱數。