[东方报]歐霸：史特加托弗上盤路路亨通[02-19]

另一場歐霸附加賽首回合激戰，由些路迪主場硬撼史特加。些路迪一向都係「山寨王」，出唔到大場面，史特加近期贏到開巷，今仗有力反客為主搶先機，讓球盤讓平半，上盤呢封利是咪嫌少。（Now 643周五凌晨4時直播）

蘇超班霸些路迪今季內部立立亂，先有主帥羅渣士被炒，搵嚟退隱多年嘅舊帥馬田奧尼爾救亡，雖然係講明只做看守領隊，球隊亦重上正軌，點知從美職來投嘅新帥韋費特藍斯完全唔掂檔，上年年尾中途接手，教咗8場只得2勝6負，差到冇朋友，就匆匆結束其33日嘅「綠白兵團」生涯，球隊無奈地要請馬田奧尼爾今季第2度出山。

些路迪歐戰冇料到
些路迪現階段以聯賽行先，加上今屆歐霸聯賽階段只得3勝2和3負，僅排第21位要踢附加賽，再次證明出到歐洲賽都係冇料到。

另邊廂，德甲勁旅史特加狀態大勇，各項賽事近6場獲5勝1負，前鋒迪米洛域同丹尼斯烏達夫更頻頻入波，腳風順到冇朋友。查實史特加今屆歐霸聯賽階段取得5勝3負，累積15分，只係落後第8位嘅羅馬1分而無緣直入16強，非常唔抵，今仗對住淨係識做「山寨王」嘅些路迪，絕對係抽到好籤，上盤有計。