[东方报]英超：連場報捷信心返晒嚟 曼聯行運人見人愛[02-23]

大年初七人日上演今輪英超壓軸大戰，愛華頓主場硬撼曼聯。「拖肥糖」進攻核心基亞利殊重創，攻力進一步受削，相反曼聯自卡域克接手後，連場報捷信心返晒嚟，「紅」運當頭咪拗頸，一於捧客勝。（Now 621周二凌晨4時直播）

愛華頓狀態麻麻，各項賽事近8仗贏得2場咁大把，最大鑊係進攻核心基亞利殊喺1月對阿士東維拉之役受傷，需要做手術，好大機會提早收咧，呢位曼城借將今季加盟後，20場聯賽入2球及交出6個助攻，冇咗佢攻力再打折扣，「拖肥糖」近4仗只入5球，上仗更加喺領先情況下，以1比2反輸畀般尼茅夫，仲有後衞積克奧拜恩提早拎「利是」被逐，賠了夫人又折兵。

卡域克轉正靠歐聯入場券
相反，曼聯送走瘟神魯賓艾摩廉，搵嚟名宿卡域克接手教到季尾，即刻重拾魔性，卡帥領軍5場獲4勝1和，包括擊敗榜首阿仙奴同曼城，唔講得笑，般奴費南迪斯打番進攻中場即時生猛晒，麥比奧莫、馬菲奧斯根夏同班捷文施斯高輪流入波，雖然係同一班人，但同之前艾摩廉嗰隊入波堅困難嘅「紅魔」相比，簡直係判若兩隊。

儘管卡域克上任後交到貨，但據報曼聯高層已經啟動新帥招聘流程，卡帥唔係坐定粒六，為咗坐正仍需繼續努力，前4嘅歐聯入場券，絕對係卡帥能否留任嘅重要指標，因此造訪狀態下滑嘅「拖肥糖」唔會腳軟，客勝有計。