[东方报]歐霸：殘陣兼態沉頭痕 維拉行衰運 里爾讓主穩[03-12]

今晚歐霸16強首回合焦點對決，英超前列分子阿士東維拉作客硬撼法甲里爾。雖然維拉有「歐霸之王」艾美利領軍，但班波狀態直線下滑信唔過，加上傷兵一大籮，邊有本錢讓波呀？里爾主場出擊之餘，近況亦顯著回勇，讓球主勝（+1）屬穩陣之選。（Now 643周五凌晨1時45分直播）

西班牙名帥艾美利以往曾帶領西維爾同維拉利爾贏過多次歐霸冠軍，被外界譽為「歐霸之王」，維拉球迷期待佢帶領球隊一搔數十載未嘗歐洲冠軍之癢都好正常。可惜維拉近期行衰運，幾位主力如馬迪卡殊、約翰麥甘尼、泰利文斯及保巴卡卡馬拉等受傷患困擾，表現走晒樣，從之前幾場連捷，嚟到近4仗僅得1和3負，再次凸顯呢類中型班板櫈深度不足嘅問題。

正所謂「巧婦難為無米炊」，強如艾帥都不得不面對現實，眼前目標先保住英超前4嘅下屆歐聯入場券方為上策，始終佢哋現時同曼聯、車路士及利物浦喺聯賽鬥到頭崩額裂，聯賽每一場都好緊要，當然你會話贏歐霸咪可以越級踢下屆歐聯，但始終人腳有限就要睇餸食飯，尤其今晚只係首回合，唔一定要贏，睇情況等次回合搏殺好過。

基奧特英超經驗派用場
另邊廂，法甲勁旅里爾擺脫早前低潮重上正軌，各項賽事近4仗錄3勝1和，包括歐霸附加賽淘汰貝爾格萊德紅星，老將基奧特對紅星嘅次回合更攻入關鍵士哥，令佢以39歲149日之齡，成為歐霸淘汰賽史上最老入波球員，可謂老而彌堅，加上佢踢過阿仙奴同車路士，應付英超後衞硬朗打法有一定心得，佢嘅經驗亦幫到一班隊友，可趁維拉沉沉哋踩多腳，主場受讓值得捧場。