[东方报]西盃：皇馬穩陣波做細界[04-01]

領先1球唔使急
西班牙盃4強次回合，皇家馬德里對皇家蘇斯達，首回合「銀河艦隊」領先1比0，次回合可以歎慢板，皇蘇歐霸盃16強出局，聯賽又頻頻失分，今季唯一目標得番西盃，作客巴拿貝只有做好防守再伺機偷雞，今場預計戰情會膠着，2.5球入球細係最佳投注選擇。（周三凌晨3時30分開賽）

皇馬現時「三路齊發」，西甲、歐聯同西盃都進入最後直路，西盃4強首回合，作客憑小將安迪歷一箭定江山，手執1球優勢返主場出擊，可以放慢節奏毋須急於進攻，尤其球隊近6場全部未能保持不失，今場更加要做好防守，免得首回合優勢冇晒。

皇蘇打反擊博偷雞
至於皇蘇近期接2連3遭受打擊，包括歐霸盃16強被曼聯淘汰出局，聯賽又頻頻失分跌出歐洲賽資格區域，到訪巴拿貝收復首回合失地更係難度極高，唯一策略係先做好防守，再伺機博偷雞，加上雙方近6次交手5次開2球或以下，推介入球細。