[东方报]世冠盃：穩陣至上「加加」有求吼半和[06-16]

聽朝世冠盃C組賽事，南美勁旅小保加火併葡超賓菲加。由於同組拜仁慕尼黑實力超班，出線十拿九穩，而奧克蘭則屬「魚腩」冇乜威脅，呢組另一個出線席位，預計會係小保加同賓菲加兩隊之爭，今場正面交鋒等同淘汰賽，相信雙方都會小心翼翼，以免落後陷入劣勢，特別係小保加近5場有4次開半場和，咁好路不妨再追。（周二早上6時開賽）

小保加成浸「曼聯味」
小保加近年吸納唔少歐洲回流球星，包括踢過曼聯嘅前鋒卡雲尼、門將羅美路、中場安達靴里拉同後衞馬高斯盧祖等，成浸「曼聯味」出晒嚟，至於賓菲加今次亦遣強陣去美國，已宣布重返羅沙里奧中央嘅前阿根廷國腳迪馬利亞，都會踢埋世冠盃先離隊，臨別秋波戰意唔使懷疑。

賓菲加今季喺葡萄牙本土賽事成績唔曳，收獲1冠2亞，聯賽盃決賽擊敗士砵亭封王，但葡萄牙盃同葡超就輸畀士砵亭獲得亞軍，佢哋喺歐聯表現亦唔算太差，聯賽階段排第16名出線，之後16強階段兩回合不敵巴塞隆拿出局，叫做符合預期，嚟到世冠盃舞台都有一定競爭力。至於小保加屬阿甲爭標分子，踢法特點守強攻弱，尤其早段更加保守，經常開出半場和，今場關乎出線更加穩陣至上，半場和放心捧場。