[东方报]世冠盃：艦隊發炮勢破多蒙特[07-05]

另一場世冠盃8強上演2024年歐聯決賽翻版，皇家馬德里對多蒙特，皇馬由新帥沙比阿朗素領軍之下，表現愈來愈上力，取得3連勝，新星干沙路加西亞狀態大勇，加上基利安麥巴比已復出，恐怕「蜜蜂兵團」防線難以招架。最關鍵係雙方屬於格食格，近4次對賽，皇馬獲得全勝，主勝值得追捧。（周日凌晨4時開賽）

皇馬今屆世冠盃發揮穩定，撇開首仗打和「神奇球隊」希拉爾，近3仗都展現王者霸氣，連續擊敗帕丘卡、薩爾斯堡同祖雲達斯。21歲前鋒干沙路加西亞演出一鳴驚人，今屆上陣4場射入3球及1次助攻，狀態非常勇猛，今仗隨時又有波入。此外，首席射手基利安麥巴比腸胃炎痊愈後復出，上仗先任後備，今仗能夠以最佳鋒線人腳強攻多蒙特。值得一提，新加盟右翼衞阿歷山大阿諾特上仗首次貢獻助攻，同隊友默契愈來愈好。

新帥沙比摸清對手
同埋皇馬主帥沙比阿朗素之前執教利華古遜，多次同多蒙特交鋒，熟悉對手路數，相信「沙比仔」可以作出針對性部署提升勝算。

至於多蒙特同樣3連勝，但對手只係馬姆洛迪辛當斯、蔚山ＨＤ、蒙特雷，成績有「水份」。新加盟中場祖比比寧咸今仗停賽，實力難免受到削弱，呢位新星亦無緣同效力皇馬嘅哥哥祖迪比寧咸交手。多蒙特近年遇上皇馬，都陷入劣勢，近4次對賽全部輸波，上年10月歐聯「聯賽階段」更大敗2比5，恐怕難破宿命。