[东方报]意甲：捷禾執唔掂國米細盤拖住先[08-25]

新一季意甲首輪壓軸之戰，國際米蘭主場鬥拖連奴。國際米蘭6月初換帥，聘請名宿捷禾接手執教後，表現立即走樣，包括世冠盃16強出局，即使踢聯賽亦不宜高估。翻查兩隊近8次對賽有6次總入球開2球或以下，寧願博中位數2.5球嘅入球細。（Now 638周二凌晨2時45分直播）

國際米蘭過去5季能夠2次捧聯賽冠軍，以及2次打入歐聯決賽，兩位教練干地、施蒙尼恩沙基居功厥偉。「細恩」6月初離隊轉投沙特阿拉伯豪門希拉爾，國米摒棄以往聘請名帥傳統，搵來捷禾領軍，可以話係舢舨充炮艇。呢位44歲前羅馬尼亞國腳掛靴後，大部分時間教國米青年軍，直至今年2月擔任帕爾馬教練，先至首嘗做主帥滋味，突然要佢率領豪門勁旅，恐怕未夠班。

事實證明管理層決定錯誤，國米喺6月世冠盃分組賽對蒙特雷、浦和紅鑽，都陷入苦戰，16強立即吞富明尼斯兩蛋出局。國米今夏亦冇簽入具級數球星，熱身賽表現一般，今仗惡唔出樣。

拖連奴一向硬淨
至於拖連奴同樣更換教練，請來前拉素主帥馬高巴朗尼領軍，論整體人腳質素唔及國米，惟有專注踢穩守突擊。拖連奴一向好守得，即使輸波亦甚少大敗，例如上季聯賽2次同盟主拿玻里交手，都只係小負0比1及0比2，今仗捧細為妙。