[东方报]英聯盃：作客乙組仔曼聯細保甘漆招牌[08-27]

英聯盃第2圈曼聯作客乙組仔甘士比；英超豪門曼聯近11年首次出戰第2圈賽事，認真失禮。由於「紅魔鬼」現時最重要目標係打開英超勝利之門，踢盃仔可能留力，預料就算贏都係小勝，寧願博中位數3.5球嘅入球細。（無綫myTV Super周四凌晨3時直播）

根據英聯盃規則，冇份參加歐洲賽嘅英超球隊要由第2圈踢起，造就曼聯提早亮相。「紅魔鬼」今夏已斥資超過2億鎊增兵，但成績仍然冇改善，英超開季後2戰只有1和1負，最諷刺係唯一嘅入球竟然來自對手擺烏龍。網絡上愈來愈多聲音要求會方解僱領隊魯賓艾摩廉。呢位葡萄牙少帥現時首要目標係全力爭取周六晚英超主場擊敗般尼，以平息民憤，今場英聯盃應該會出副選，但求贏波晉級已足夠，冇必要浪費體力大炒對手。事實上，曼聯近期攻門效率甚低，好難期望可以取得大勝。

甘士比泊大巴頑抗
甘士比雖然實力唔及曼聯，但今季踢5場聯賽保持不敗，取得3勝2和。難得有機會主場迎戰英超大球會，球員肯定額外落力做齣好戲，就算贏唔到都唔會輕易令對手取得入球，估計會「泊大巴」死守，希望守到互射12碼，屆時就有望爆冷晉級。