[东方报]意甲：華Dee駕到克雷莫納讓客發維[09-15]

今晚意甲頭場，維羅納主場迎戰克雷莫納。維羅納開季表現令人失望，連場不勝信心跌到落谷底，相反剛獲「華Dee」占美華迪加盟嘅克雷莫納，聯賽兩連勝弗到漏，加上近年碰頭少輸波，克雷莫納有得受讓咁筍，必捧讓球客勝（+1）。（Now 638周二凌晨零時30分直播）

維羅納防守靠唔住
一向都係護級分子嘅維羅納，今季各項賽事踢咗3場，法定時間只得2和1負，喺意盃對住弱旅切里尼奧拉，都要鬥到互射12碼先晉級，佢哋上場聯賽慘吞拉素4蛋，上半場已經失咗3粒，防守表現完全係「災難級」，全場控球率得3成，毫無還手之力。

另邊廂，升班球隊克雷莫納啱啱簽入前李斯特城傳奇占美華迪，不過「華Dee」喺日前出席記者會時，就被當地傳媒質疑佢已經38歲，仲可唔可以應付到意甲呢個水平嘅賽事，激到「華Dee」當場怒爆記者，一定想落場證明自己「仲有貨賣」。

不過「華Dee」今仗可能先任後備，皆因克雷莫納開咧頭兩輪接連擊敗AC米蘭同薩斯索羅，信心爆晒棚，走勢咁順唔急於派「華Dee」落場。睇埋雙方近5次正式賽事交手，克雷莫納和咗4次，唔赦維羅納，寧買當頭起，克雷莫納讓球客勝（+1）有計。