[东方报]歐冠：穩陣踢法迎戰馬賽 艦隊新組裝強細出擊[09-16]

歐聯聯賽階段首輪賽事展開，周三凌晨先踢6場，重頭戲皇家馬德里主場迎戰馬賽。「銀河艦隊」今季由新帥沙比阿朗素帶領下重新啟航，西甲開季4連勝，歐聯首輪亦志在必得，不過暫時所見，球隊踢法穩中求勝，近4場全開3球或以下，馬賽作客亦會加強防守，中位數3.5球入球細放心捧。（Now 643周三凌晨3時直播）

今年6月接替安察洛堤嘅沙比阿朗素，執教皇馬運作暢順，由世冠盃首場賽和希拉爾起計，至今10場錄得8勝1和1負，唯一敗仗係世冠盃4強不敵巴黎聖日耳門，經過一輪探索，相信「沙比Sir」已經取得球員信任，全力向歐聯同西甲進發。

贏波為本連場小勝
現時皇馬陣容，比起上手「肥安」時期作出微調，包括棄洛迪高高斯改用艾達古拿，防線新兵甸恩胡積臣亦獲重用，至於阿歷山大阿諾特就同丹尼爾卡華積輪流踢，踢法上亦較為穩陣，實行贏波為本，今季4場西甲有3場贏對手1球，相信今場歐聯亦會繼續奉行此策略。

馬賽人腳唔差，擁有奧巴美揚同格連活特，不過季初表現飄忽，其中近兩場作客全敗，兩場都係輸0比1，佢哋喺夏季轉會窗關閉前，先後借入法國中堅班捷文柏華特同摩洛哥中堅阿古特，強化整條防線，意大利籍主帥迪薩比嘅防守意圖相當明顯。對於馬賽嚟講，今場最理想賽果係悶和0比0，1球小敗亦可接受，3.5球入球細係最佳選擇。