[东方报]英錦賽：劍橋聯主場唔赦盧頓[10-07]

星期三凌晨有多場英格蘭聯賽錦標，南部H組賽事，英乙劍橋聯主場對英甲盧頓。英格蘭低組別球隊水準接近，英乙球隊越級贏英甲甚至英冠球隊時有發生，而且劍橋聯主場打高兩皮波，近7次主場僅1敗，盧頓作客讓波讓唔起，睇好劍橋聯嘅讓球主勝（+1）。（周四凌晨2時開賽）

盧頓前季仲喺英超角逐，佢哋英超護級失敗後，上季英冠再沉淪，結果連續兩季降班，今季落到英甲終於穩定落嚟，暫時排聯賽中游，佢哋現時人腳同前季英超時已今非昔比，而且近況麻麻，近5場只得1勝，近3場作客1和2負，入1球失7球，雖然喺英錦標首輪大勝英乙中游嘅班列特4比1，但當時係主場出擊，作客就另一回事，並無必勝把握。

地頭近7戰僅1敗
劍橋聯上季英甲護級失敗，今季降落英乙角逐，隨即有反彈表現，現時排聯賽第7，有機會爭升班，佢哋近期喺英聯盃表現唔錯，仲連過兩關，包括第2圈主場3比1擊敗英冠中游球隊查爾頓，可見佢哋主場越兩級挑戰都能贏波，直至早前第3圈先作客0比1輸畀英超嘅富咸出局，雖敗不辱。

今場係劍橋聯英錦標首場比賽，佢哋主場成績特佳，今季7次主場出擊，錄得5勝1和僅1負，表現可靠，今場主場有得受讓，讓球客勝（+1）屬不二之選。