[东方报]英超：甘士比心雄繼續玩大佢[09-02]

英錦標北部C組分組賽，英甲球隊巴拉福特主場迎戰英乙仔甘士比。甘士比上個禮拜英聯盃淘汰曼聯爆出驚喜，再度出戰盃賽信心十足；巴拉福特踢法進取，主場出擊更加唔會龜縮，2.5球入球大玩得過。（周三凌晨2時30分開賽）

簡單講講英錦標賽制，賽事由24支甲組、24支乙組同16支被邀請嘅英超球隊Ｕ21角逐，64隊分成16組，南北部各有8組。每組4隊只會各對一次，即係每隊只係踢3場，贏波3分，和波就即刻互射12碼，射贏有2分，射輸都有1分，每組頭兩名打入32強淘汰賽。

巴拉福特主場唔會縮
今場話題之處，梗係英聯盃第2圈淘汰曼聯嘅甘士比，大家都關注呢支乙組仔喺英錦標嘅演出。其實甘士比開季以來表現相當唔曳，計埋對曼聯一役，法定時間獲4勝3和1負，只有上場敗仗入唔到波，入球能力唔錯。

巴拉福特聯賽錄4勝2和，英聯盃亦接連淘汰布力般流浪及史篤城殺入第3圈，特點係踢法進取，近6場有5場開3球或以上，有望同甘士比合演入球騷，推介入球大。