[东方报]意甲：踢得謹慎睇定食博洛尼亞半和好路[12-01]

今晚意甲獨腳戲，由博洛尼亞主場迎戰克雷莫納。博洛尼亞雖然位居前列，但踢法謹慎經常睇定先食，易邊後先嚟料，克雷莫納3連敗更唔敢冒進，半場和不妨再追。（Now 638周二凌晨3時45分直播）

博洛今季要兼顧聯賽同歐霸盃兩條戰線，本身「家底」唔及其他豪門咁厚實，喺有限人腳下點樣做好留放，絕對係一門學問，因此決定採用留前鬥後策略。博洛上半場通常以慳力為主，刻意拖慢比賽節奏，總之敵不動我不動，唔輸就得，並藉此摸清對手底細，下半場睇準機會先拮佢一刀，睇番佢哋各項賽事近6場錄得4勝2和，而且全部半場同對手打和，其中4次半場波膽為0比0，可見比賽初段踢得非常謹慎。

克雷莫納擺鐵桶陣搶分
今季升班嘅克雷莫納，經歷季初一段「小陽春」後，近況亦告回落，連續3場聯賽輸波，包括以0比1不敵同樣今季升班嘅比薩SC，老將占美華迪同另一前鋒邦拿索利，近期表現時好時壞，今仗仲要作客，梗係守住嚟踢。既然博洛習慣初段玩試探，克雷莫納亦擺鐵桶陣博1分，上半場隨時陷於膠着，半場和捧得過。