[东方报]英超：利物浦歸位主W趁熱食[01-01]

近期谷底反彈嘅利物浦，元旦日主場迎戰列斯聯，「紅軍」近期還原基本步，踢番高位逼搶同後防減少甩漏，自然可以贏波；列斯聯近況亦唔差，不過同逐漸回復水準嘅利物浦仲有一段距離，新年第一擊撐「紅軍」，熱捧主勝。（Now 621及611周五凌晨1時30分直播）

利物浦成績回穩，近期4連勝，近7場亦錄得5勝2和不敗走勢。主帥施洛面對現實，喺打法上作出微調，唔再追求悅目谷晒上去搶攻而忽略防守，反而有時會因應局勢踢「擦鞋仔波」，成績立即有改善。

「紅軍」今夏兩位重磅收購阿歷山大伊沙克同域斯已相繼開齋，較為可惜係伊沙克早前受傷，不過唔重要，佢哋今季最對辦新兵其實係艾基迪基，呢位法國前鋒為「紅軍」攻入11球及2次助攻，只要佢在陣，進攻齒輪就能夠繼續運轉，加上域斯開齋後信心大增，大有希望繼續贏波。

列斯聯作客走晒樣
列斯聯近期打出一段2勝3和不敗走勢，包括首循環主場3比3逼和利物浦，前鋒線靠卡維特利雲單天保至尊，不過作客係佢哋弱項，近6場僅得2和4負，兩隊比較之下，都係揀利物浦好啲。