[东方报]歐霸：艾美利識玩速戰速決 維拉半Ｗ無堡不落[01-29]

繼歐聯後，歐霸盃今晚亦上演聯賽階段最後一輪。已鎖定前8位置嘅阿士東維拉，主場迎戰奧地利代表薩爾斯堡。維拉喺歐霸盃實力超班，之前7輪賽事贏咗6場，喺氣勢逼人嘅維拉公園出戰，要打爆疲弱嘅薩爾斯堡毫冇難度，半場主勝穩開！（Now 643周五凌晨4時直播）

維拉上輪作客擊敗費倫巴治，同里昂同得18分排前兩名，提前獲得16強席位，不過仲要爭取更高名次確保成為種子隊，唔使怕佢哋今場會放軟手腳。何況維拉上次主場出擊輸畀愛華頓，喺維拉公園11連勝走勢終止，今場肯定要踢爭氣波氹番球迷。

大家都知維拉領隊艾美利係「歐霸專家」，就算要為聯賽保留實力，今場都唔會掉以輕心，反而會全力爭取早段奠定勝利基礎，等下半場有輪換空間。維拉今屆3場歐霸主場，全部都喺半場領先，對上4場比賽亦有3次半場領先，搶韁踢法有保證。

薩爾斯堡焗攻兇險
奧地利班霸薩爾斯堡今非昔比，之前7場歐霸盃輸足5場，依家排喺第28位，要爭附加賽資格今場非勝不可，作客都要焗住搶攻，但咁就啱晒以凌厲反擊見稱嘅維拉，面對奧尼屈堅斯等快攻高手，客軍隨時半場都頂唔住，半場主勝屬穩陣之選。