[东方报]英超：新特蘭鬥般尼半場和要追[02-02]

老對手相遇熟晒路
英超今輪壓軸戲由兩支升班球隊擔綱，新特蘭喺光明球場惡鬥般尼。兩軍今季升班後表現截然不同，「黑貓」企穩中游，而般尼一直喺下游掙扎，不過老對手碰頭大家熟晒路，肯定步步為營，雙方近7次交手5次開半場和，值得再追。（Now 621周一凌晨4時直播）

新特蘭季初表現令人眼前一亮，一度進佔前4，舊年夏天收購嘅經驗戰將格列沙加，絕對係球會一大功臣，不過呢名前阿仙奴中場因傷缺陣，冇咗佢喺度瞻前顧後，新特蘭進攻起嚟又差咁啲。

主場硬淨今季未輸過
好彩光明球場係新特蘭福地，今季「黑貓」聯賽主場出擊獲6勝5和，喺英超唯一一隊保持主場不敗嘅球隊，佢哋着重防守，曾經0比0逼和曼城一役，更成為「藍月亮」由盛轉衰嘅轉捩點。不過新特蘭主場入波始終唔多，入18球失9球，今場遇到老對手，相信場面會比較膠着。

般尼聯賽23戰只得15分排尾二，不過踏入2026年有啲起色，先後賽和曼聯、利物浦及熱刺，3場都能夠喺強隊身上入到波，英足盃亦大勝米禾爾5比1晉級，今場對住新特蘭，唔係冇機會搶分，始終上季大家都喺英冠鬥過，心理上唔會輸蝕，加上雙方近7次交手，5次半場不分勝負，半場和可以再追。