[东方报]英冠：米堡求反彈平手盤要撐[03-02]

本輪英冠壓軸戰，力求反彈嘅「2哥」米杜士堡，將會作客伯明翰。米杜士堡聯賽3場不勝後，爭取以前2名直接升班優勢盡失，係時候反彈搶分，好彩佢哋今場遇到「私房菜」，米堡近6次鬥伯明翰全部贏晒，今場開平手盤絕對值得捧場。（無綫myTV SUPER周二凌晨4時直播）

米杜士堡今季水準穩定，一直Keep住喺聯賽榜前列，不過2月中榜首大戰之中，作客1比3不敵高雲地利後，球隊唔知係咪輸到失咗魂，竟然連續2場喺主場，畀尾二同尾三嘅牛津聯及李斯特城逼和，3場夾埋痛失7分。

未計尋日賽事，米堡雖然排喺次席，但只領先多踢1場嘅米禾爾1分，比踢少1場嘅葉士域治多3分，已經失去直接升班優勢。其實佢哋未輸畀高雲地利之前，作客曾經3連勝，而且今仗對手伯明翰堪稱「私房菜」，米堡近6次交手全勝，包括3次作客聖安德魯球場，心理上有優勢。

近6次對伯明翰錄全勝
伯明翰近8場主場錄得2勝6和，表面賽績係不敗，但另一角度睇就係欠缺贏波運氣，球隊上仗作客慘吞米禾爾3蛋，結束8場不敗走勢，而且仲有中場主將祖漢蘇利斯領紅牌，今場要停賽，實力進一步削弱，平手盤寧捧米杜士堡。