[东方报]歐冠：地獄主場出擊神助 加拉塔沙雷唔赦紅軍[03-10]

歐聯16強展開首回合大戰，加拉塔沙雷主場迎戰利物浦，加拉塔沙雷「地獄主場」享譽全歐，每每令各豪門頭痛不已，加上近年大手招攬域陀奧森漢、利萊辛尼、根度簡等加盟，星味大增，近5次歐洲賽對英超球隊3勝1和1負，成績亦唔差，加上近期3連勝狀態勇，「紅軍」唔輸都要還神，主隊受讓半一必捧下盤。（Now 643周三凌晨1時45分直播）

雖然加拉塔沙雷喺聯賽階段成績唔算突出，8戰只得3勝1和僅僅夠入附加賽，但上圈附加賽就同祖雲達斯激戰兩回合，最終鬥到加時贏7比5，其中首回合主場大勝「祖記」5比2，可見佢哋主場威力。

除咗主場氣勢強勁，加拉塔沙雷近年增兵後實力上升，其中尼日利亞神鋒域陀奧森漢孭重飛，今季歐聯個人攻入7球，翼鋒利萊辛尼貢獻2次助攻，最重要係佢哋近年對英超球隊成績頗佳，包括去年10月主場就係憑域陀奧森漢一箭定江山1比0擊敗利物浦，今場淘汰賽場合再鬥「紅軍」，有一定心理優勢。

利物浦慢熱吼埋半和
利物浦今季咩料大家心照，雖然近期表現有啲起色，但前仗聯賽又發波瘟輸畀包尾嘅狼隊，今場首回合作客，預計主帥施洛嘅策略都係守住先，留待次回合返主場先一決勝負，所以今場讓波捧唔過，建議捧下盤之餘，留意到「紅軍」近4次作客全部半場冇交收，今場守和半場亦係合理期望，捧埋半場和。