[东方报]歐冠：PSG恃地利拆車復仇[03-11]

至於衞冕嘅巴黎聖日耳門（PSG），喺今晚歐聯16強首回合主場迎戰車路士。PSG專剋英超兵，上屆奪冠過程有辦你睇，而且「車仔」近期表現欠穩，PSG可藉地利搶先機，主勝有計（Now 638周四凌晨4時直播）

迪比利復出添火力
雖然PSG近況一般，日前先喺聯賽輸畀摩納哥，但正好及時畀佢哋一記當頭棒喝，唔敢再輕敵，而且王牌奧士文尼迪比利喺嗰場已傷愈復出，為今仗有好搏殺準備。始終PSG喺法甲係大超班，有時大意都好正常，但嚟到歐聯就會打醒精神，尤其係對住英超球隊，近7次歐聯出戰英超兵，獲得5勝1和僅1敗，包括上屆淘汰賽先後殺退利物浦、阿士東維拉同阿仙奴，加上佢哋未忘記世冠盃決賽輸畀車路士之仇，今仗一定趁主場加多兩錢肉緊復仇。

另邊廂，「車仔」年頭怒炒馬利斯卡，搵來羅仙尼亞接手，一度止跌回升，但近期又變差，各項賽事近6仗法定時間只係贏得2場，其中5仗有失波，包括日前英足盃面對英冠球隊域斯咸，就算以副選出擊，亦要鬥到加時先贏4比2晉級，防守不穩。而且「羅Sir」上任後大部分對手都較弱，偏偏3鬥阿仙奴全部輸晒，包括英聯盃兩回合全敗4強止步，對住硬嘢PSG難樂觀，主勝有計。