[东方报]德甲：首回合悶和冇得再縮 禾堡大起柏達邦[05-25]

德國附加賽次回合，柏達邦主場迎戰禾夫斯堡，德乙球隊柏達邦首回合爆冷，成功守和0比0，必然大大提升士氣同信心，今仗有地利優勢，應會踢得更主動，力爭贏波升班。至於禾夫斯堡為保住德甲席位，亦不能退縮，隨時同對手鬥攻，睇番柏達邦近4次主場出擊，總入球全開3球或以上，一於再追中位數2.5球嘅入球大。（周二凌晨2時30分開賽）

柏達邦雖然係乙組仔，但攻力相當不俗，今季34場德乙入59球，甚至比以冠軍資格升班嘅史浩克04多9球。皆因進攻主將菲臘比爾比查腳風非常順，即使司職中場都有15個聯賽入球進帳，柏達邦首回合作客，焗住採取主守戰術，難免限制菲臘比爾比查發揮，今仗返回主場，目標要贏波，應該輪到佢表演。不過，後衞莊拿史迪加停賽，防線存在隱憂，未必可以保持清白之身。

禾堡作客表現勝主場
禾夫斯堡曾經係德甲中上游分子，近年表現持續低沉，今季淪落到要踢護級附加賽，的確令人失望。不過，爛船始終有三斤釘，禾夫斯堡人腳具備一定級數，包括有前曼聯中場基斯甸艾歷臣，呢位丹麥國腳大戰經驗豐富，相信可以喺今場生死戰發揮重要作用。此外，兩位前鋒柏積仙奴域、穆罕默德艾穆拉今季聯賽各有8球進帳，有力攻入對手大門。

值得留意，禾夫斯堡今季德甲作客成績（19分）遠勝主場（10分），近4場作客合共轟入9球，既然雙方都要豁出去一搏，可望合演入球騷。