[东方报]國友賽：球星輪流踢影響 巴西入球細手到拿來[05-31]

巴西出戰世盃決賽周前安排2場熱身賽，首仗率先主場迎戰另一支決賽周球隊巴拿馬，論整體實力，巴西的確勝一籌，但考慮今仗試陣為主，未必全力以赴，尤其係球員為避免受傷，影響踢世盃，應會點到即止。至於巴拿馬反擊力難成氣候，參考巴西近4場有3次總入球開3球或以下，寧願博3.5球嘅入球細。（周一凌晨5時30分開賽）

巴西聘請意大利名帥安察洛堤執教後，踢法傾向穩陣行先，「肥安」揀選嘅人腳實而不華，尤其係中場以工兵型球員為主，包括卡斯米路、法賓奴泰華利斯、般奴古馬雷斯，攔截力雖強，但創造力不足，更依賴雲尼斯奧斯祖利亞、拉芬夏比洛尼、馬菲奧斯根夏等鋒線球員個人發揮，難免影響進攻效率。更何況今場比賽過程，「森巴兵團」應會大幅換人，實在不宜高估。

此外，「森巴兵團」球員年齡偏高，兩位後衞丹尼路雷斯、阿歷士辛度分別達34及35歲，加上防線主力馬昆奴斯哥利亞剛踢完歐聯決賽仍未歸隊，預料巴西今場唔會太冒進，避免防線承受太大壓力。

巴拿馬硬淨唔易食
另邊廂，中北美洲球隊巴拿馬球員名不經傳，難得可以同星光熠熠嘅巴西交鋒，通常會踢得比較落力。領隊基斯甸臣係前西班牙國腳，曾經執教過列斯聯、聖基萊斯聯等球隊，注重體力型踢法，相信會以緊逼戰術同巴西周旋。睇番巴拿馬近4場熱身賽表現四平八穩，包括打和玻利維亞1比1，以0比1不敵墨西哥，仲有2次對南非分別踢成1比1及贏2比1，預料就算今場頂唔住輸波，都係小負居多。