[东方报]國友賽：對賽佔優人腳齊 中國訪獅城客W穩陣[06-05]

今晚《on.cc東網》直播一場國際熱身賽，新加坡主場迎戰中國。「獅城」主場有一定威力，不過整體實力同中國有一段距離；國足對賽成績一向食住新加坡，近5次交手4勝1和，最重要係U23同U17近期相繼取得好成績，國足喺一眾小師弟面前更加唔衰得，今仗全力出擊，客勝穩開。（on.cc東網周五晚7時30分直播）

國足今次國際賽檔期安排兩場熱身賽，今仗先作客新加坡，之後返主場對泰國，主教練邵佳一徵召強陣，包括重召前鋒武磊及蔣光太，一眾主力如韋世豪及王鈺棟都入圍，仲有港人中場戴偉浚，戰意有保證。

急需贏波搶排名積分
國足再度無緣世盃無疑令人失望，但今年初國足U23同近期國足U17，相繼在其所屬級別亞洲盃打入決賽，最後獲得亞軍，就令人見到希望，同時更鞭策一班大國腳都要有好表現，而且國足亞洲排名已經跌至15位，急需贏波爭取國際排名積分，所以肯定會積極求勝。

新加坡近況唔差，近5場贏4場，不過對手偏弱，例如上仗主場4比0贏蒙古，全隊未受考驗，今仗對國足作為下月東南亞錦標賽熱身備戰，贏波難度倍增。國足兩年前世盃外第2圈作客新加坡，領先兩球下被逼和2比2，相信今次國足唔會再大意，客勝放心捧。