[东方报]國友賽：球王回歸落場鬆吓 阿根廷慢攻出細貨[06-09]

肩負世盃衞冕重任嘅阿根廷，約戰歐洲球隊冰島進行最後熱身。阿根廷目前有唔少傷兵，上場對弱旅洪都拉斯小勝2比0，明顯未盡全力，今場雖然有美斯復出候命，但預計只會短時間落場郁下，決賽周開打前都係穩陣為先，博3.5球入球細先係明智選擇。（Now 630及618周三早上9時直播）

阿根廷今年熱身賽未有約戰一線球隊，贏毛里塔尼亞、贊比亞、洪都拉斯係意料中事，純粹係畀班球員喺冇壓力情況下，有多啲實戰機會。阿根廷陣中絕大部分球員都係上屆冠軍功臣，無論合作性同戰術都唔需要再演練，更加唔需要搏命，只求健健康康咁去提升比賽狀態。

冰島守得兩嘴
阿根廷依家有唔少球員負傷，「球王」美斯大腿傷患亦都係啱啱先至好番，預計今場只會踢短時間輕舒腳頭，加上尼高柏斯、祖利安艾華利斯等攻擊主力今仗上陣成疑，預計領隊史卡朗尼會畀一眾國腳輪流落場試陣，戰術上唔會太過執着，入波都係點到即止，今場大炒機會唔大；加上佢哋近10場比賽，8次開3球或以下，今仗入波唔慌多。

冰島鋒力不足，前面靠單箭頭威路姆臣去湧，好難對阿根廷構成威脅，不過冰島防守唔差，上場熱身賽對日本僅輸0比1，今場面對強敵，好大機會繼續全軍退守。睇番冰島近6場比賽，都有4場總入球開2球或以下，3.5球嘅入球細值得推介。