[东方报]世界盃：墨西哥半和冇厄你[06-30]

壓力巨大以穩為先
世盃32強，主辦國之一嘅墨西哥迎戰厄瓜多爾，雙方屬於老對手，熟悉彼此踢法，過去交鋒慣踢穩陣波，往往陷入膠着狀態，近3次對賽上半場都打和，加上淘汰賽一戰定生死，相信兩隊都會比較謹慎，避免犯錯落後，一於再追半場和。（Now 618、616及馬會指定場外投注處周三早上9時直播）

厄瓜多爾守強於攻
墨西哥佔盡天時、地利、人和，表面上有優勢，但同時亦由於身為東道主，獲現場國民寄予厚望，背負沉重壓力，球員抱住唔輸得嘅心態，表現難免綁手綁腳，導致影響發揮。事實上，睇番墨西哥今屆3場分組賽表現並非太突出，能夠贏南非2比0，好大程度上因為對手有近一半時間踢少1人。次輪多得南韓防線球員犯錯，先至入到波小勝1比0，即使最後1場大炒捷克3蛋，但上半場亦互交白卷，唔好期望今仗可以上半場領先。

至於厄瓜多爾擁有車路士天價防守中場摩西斯卡些度、阿仙奴後衞軒卡派爾、巴黎聖日耳門中堅威廉柏曹助陣，正因為具級數主力都屬於中後場球員，形成守強攻弱風格，首仗踢到臨完場先至失守，僅以0比1不敵科特迪瓦，其後同庫拉索悶和0比0，上場以2比1反勝有所保留嘅德國，但上半場亦打成平手，換言之，厄瓜多爾今屆3場都開出半場和。呢支南美洲球隊今場作客情況下，更會以穩陣行先，避免先失波，否則一旦落後，難以收復失地。以厄瓜多爾硬淨踢法，相信上半場可以同墨西哥抗衡。