[东方报]世界盃：杜曹保守唔會強攻 英格蘭細踢穩陣波[07-01]

世盃32強焦點戰，英格蘭火併剛果民主共和國，「三獅兵團」表現一般，主帥杜曹傾向穩陣戰術，踏入淘汰賽預料會更保守。剛果民主共和國表現硬淨，加上英格蘭各項賽事近9場有7次開2球或以下，寧願博2.5球入球細。（Now 618及616周四凌晨零時直播）

英格蘭首場分組賽同克羅地亞合演入球騷，以4比2勝出，以為風格出現轉變，但原來只係曇花一現，次輪立即同加納悶和0比0，上仗對已篤定出局嘅巴拿馬，都要等到下半場先至入波，最終小勝2比0。

賴斯占士昆沙都有傷
「三獅兵團」中前場球員把握力未如理想，尤其係身價達8,000萬歐元（約7.1億港元）嘅安東尼哥頓，喺邊路發揮唔到應有嘅側擊力，但杜曹鍾意用呢位翼鋒擔任正選，變相削弱球隊攻力。

此外，由於英格蘭大部分主力效力豪門，經過頻密賽程球季後，難免出現疲態甚至傷患，中場迪格蘭賴斯早前傳出小腿有輕傷，列斯占士及昆沙都有傷難以披甲，為減輕球員身體負荷，估計英格蘭唔會推得太前搶攻。

另邊廂，剛果民主共和國即使大賽經驗及人腳質素稍遜，但勝在球員體力雄渾，並且拚勁十足，對住有C朗、般奴費南迪斯等球星助陣嘅葡萄牙，都能夠全身而退，其後僅以0比1不敵哥倫比亞，踢法夠晒死纏爛打。球隊防線兩位主力雲比沙卡、杜安薛比喺英超打滾多年，非常熟悉英格蘭實力，就算輸亦唔會大敗，主勝太熱冇肉食，2.5球嘅入球細更值博。