[东方报]世界盃：巴洛根停賽鋒力削 美國比利時吼和波[07-06]

世盃16強，美國主場迎戰比利時，身為主辦國之一嘅美國今屆展現霸氣，4場合共轟入10球，但有3球進帳嘅首席射手科拿連巴洛根今仗停賽，嚴重削弱鋒線實力，進攻失去重心下要射破「歐洲紅魔」比利時大門，並非易事。至於比利時則變成「和波專家」，今屆4戰有3場法定時間內打和，雙方屬於五五波，不妨再博分頭更佳嘅和。（Now 618、616及馬會指定場外投注處周二早上8時直播）

美國擁有天時、地利、人和，踢完首兩場分組賽已提早取得出線權，留力之下先至輸畀土耳其，上場32強使出真工夫贈波斯尼亞兩蛋。不過，入波功臣科拿連巴洛根因為爭波時踩中對手死腳，被球證紅牌趕出場，今場要「坐波監」，預料「肥普」會起用列卡度柏比擔任正選，呢位23歲新星今屆1次正選3次後備入替，4場都冇波入，好難期望佢可以射破比利時鋼門高圖爾斯十指關。加上另1位主力基斯甸普列錫曾於首仗對巴拉圭受傷，即使已經傷愈，但仍未重拾最佳狀態，科拿連巴洛根缺陣之下，美國鋒線頓失重心。

紅魔受教訓加強防務
另邊廂，比利時雖然擁有奇雲迪布尼、謝利美杜古、李安度杜沙特、盧卡古等星級進攻球員，但擦唔出火花，首兩場分組賽打和埃及、伊朗，面臨出局危機之下，先至如夢初醒，其後大勝新西蘭，取得出線權，上場32強對塞內加爾，一度落後0比2，踢到臨完場連入兩球逼和2比2，戰至加時嘅補時階段靠獲得12碼驚險反勝3比2，帶有幸運成分。比利時吸取教訓後，相信今場會先做好防守，避免再次落後陷入困境。尤其係上場激戰超過120分鐘，體力消耗大，匆匆再戰難免比較輸蝕，預料會放慢比賽節奏，屆時或會出現拉鋸戰，法定時間未必分出勝負。