[东方报]世界盃：整體戰出色夠硬淨 瑞士受讓要捧場[07-07]

另一場世盃16強，由瑞士硬撼哥倫比亞。大家實力咁高咁大，不過瑞士表現更加穩定，攻擊點多兼近7場未輸過，相反哥倫比亞太倚賴王牌路易斯迪亞斯，佢近期變咗黑仔王腳風欠順，實在冇本錢讓波，寧捧瑞士讓球主勝（+1）。（Now 618及616周三凌晨4時直播）

瑞士雖然唔多起眼，但表現一向四平八穩，今屆世盃4場未輸過，自從喺B組首輪意外被卡塔爾逼和1比1後，連贏3場，包括32強輕取阿爾及利亞2比0。「十字軍」勝在整體戰出色，單計進攻，今屆球隊所入嘅9球中，新星文森比佔咗3粒，而比列安保路及魯賓華加斯各入兩球，格列沙加與丹尼杜耶都有進帳，攻擊點分布平均，令對手防不勝防，加上佢哋各項賽事近7場錄得4勝3和不敗佳績，硬淨到暈。

哥倫比亞攻力欠銳
另邊廂，哥倫比亞今屆世盃同樣取得3勝1和，並喺K組力壓葡萄牙獲首名出線，表現大獲好評，不過射手路爾斯蘇亞雷斯仍未開齋，另一前鋒祖漢哥度巴上仗傷出，令哥軍進攻更加倚賴王牌路易斯迪亞斯，雖然呢位拜仁球星表現唔錯，但今屆暫時只係入得1粒，仲食咗3鋪詐胡，黑到冇朋友，難怪佢哋4戰僅入5球，攻力欠銳，點讓得起「十字軍」？轉捧瑞士讓球主勝（+1）為妙。